Sunday, February 4, 2018

රෝඩ් රනර් ෂෝ


පසුගිය ලිපියෙන් විල් ඊ කයෝට් ගැනත් එම චරිතය හමුවන රෝඩ් රනර් කාටූන් මාලාව ගැනත් කතා කළෙමු. මේ කාටූන් මාලාව ඇමරිකාවේ වුවත් වත්මන් පරපුරට අපේ සමකාලීන පරපුරට තරම් සමීප නැත.

ඉගෙන ගන්නා කෙනෙකුට ඉගෙනගන්නවානම් ඔය කාටුන් එකේ වුනත් ඕනෑ තරම් දේවල් තිබේ. උදාහරණයක් ලෙස ලොකු පල්ලමකට වැටෙන්නට යන විල් ඊ කයෝට් මත ගුරුත්වාකර්ෂණය බලපාන්නට පටන් ගන්නේ බිම බැලීමෙන් පසුවය. මේ ඔස්සේ හිතනවානම් ගුරුත්වාකර්ෂණය කියන සංකල්පය ගැන වඩා හොඳින් තේරුම් ගන්නට බැරිකමක් නැත.

මෙහි ප්‍රධාන චරිත දෙකෙන් එකක් වන කයෝට් කයෝටියෙකු වුවත් හැසිරෙන්නේ හා ක්‍රියා කරන්නේ මිනිසෙකු ලෙසින්ය. කයෝට්ට මිනිසෙකු මෙන් සැලසුම් හදන්නට මෙන්ම ඒ සැලසුම් ඉටුකර ගැනීම සඳහා අවශ්‍ය වන ඩයිනමයිට් ආදී සංකීර්ණ ද්‍රව්‍ය හොයා ගන්නට බැරිකමක් නැත. එහෙත්, ඇමරිකා එක්සත් ජනපදයේ නිරිතදිග පෙදෙස් වල හා මෙක්සිකෝවේ දැකිය හැකි වටුවෙක් වැනි කුඩා පක්ෂියෙක් වන රෝඩ් රනර් කෙනෙකු දඩයම් කිරීමට ඇති සහජ කැමැත්ත ප්‍රදර්ශනය කරමින් කයෝට් කයෝටියෙකු ලෙසද හැසිරේ.

විල් ඊ කයෝට් ජීවිතයම කැප කර තිබෙන්නේ රෝඩ් රනර්ව අල්ලා ගැනීමටය. ඔහුගේ සැලසුම් හැම එකක්ම එකින් එක ඔහුටම පාරාවළල්ලක් වුවත් කයෝට් වැඩේ අතාරින්නේ නැත. එහෙත්, රෝඩ් රනර් අල්ලගත්තා කියා ඔහුට වේලක කෑම ලැබෙනවාට වඩා ලොකු ප්‍රයෝජනයක් ලැබෙන්නේ නැත. මේ රෝඩ් රනර් කාටූනයකට යටින් කමෙන්ටුවක් දමමින් එක් අයෙක් අසා තිබුණේ මේ තරම් සැලසුම් කිරීමේ හැකියාවක් ඇති, මේ තරම් උපකරණ සපයාගත හැකි කයෝට්ට කඩේට ගොස් මස් මිල දී ගන්නට බැරි ඇයිද කියාය.

මෙහි පළ වූ පෙර ලිපියකට ප්‍රතිචාර දක්වමින් ඇණයා විසින් මෙසේ ලියා තිබුණේය.

"අතේ මුදල් ගැවසෙනවනම් මස් කෑමට සතකු මරා හැකියාව තිබුනත් කඩෙන් මස් මිලදී ගැනීමට ඇති ඉඩ වැඩි, අසීරුවෙන් ජිවත් වූ ගැටවර කාලේ අපි ගෙදර ඇති කළ කුකුලුන් මැරුව, ඒ වගේම අසල ගැවසුණු තලගොයින් සහ වලිකුකුලුන් දඩයම් කර තියෙනවා, ගමේ මන්දපෝෂණය සුලබ වූ එකල ළමුන්ගේ පෝෂණයට සහ බුද්ධි වර්ධනයට මස් මාළු කිරි බිත්තර අවශ්‍ය බව අම්ම නිතර කිවා වගේම මස් සපයා ගැනීම දිරිමත් කළා, එකම තහංචිය වුනේ පෝයදාට එසේ නොකිරීමයි. දැන් තඩි තලගොයෙක් මහගෙදර බිත්ති උඩ වාසය කරනවා, වත්තේ ලොකු තලගොයි කීපදෙනෙක්ම යහතින් ඉන්නවා, කුකුල්ලු කිරි හරක් ඇති කරන්න කිසි උනන්දුවක් නෑ, අම්ම සතියට වරක් පොලේ ගිහින් එනකොට කුකුල් මස් ගෙනවා.

දැන් ව්‍යාපාරයක් වශයෙන් සතුන් ඇති කරන අය හැර වෙනත් සතුන් මරණ අය ලංකාවේ නැති තරම්, මම මෑතකදී රක්ෂිතයක් ආශ්‍රිතව සමීක්ෂණයකට සම්බන්ද වුණා,එහි ප්‍රසිද්ධ දඩයම් කරුවන් සියල්ල හමුවුනා, ඔවුන් සතු හොර තුවක්කු තවම තිබුනත්, පෙරට වඩා වන සතුන් බහුල වුනත් දැන් ඔවුන් කිසිවෙකුත් දඩයම් කරන්නේ නෑ, ඔවුන්ට මස් ඕන වුනොත් කඩෙන් කුකුල් මස් ගෙනව, වාරයට මීපැණි රැස් කිරීමේ පමණක් කරනවා, පෙරට වඩා වැඩි ආගමික නැබුරුවක් ඇතිවීම එයට ප්‍රමුක හේතුව බව ඔවුන් කීවත්, වයසට යෑම නිසා අසනීප වීම, රැකියාවේ නියුත් දරුවන්ගෙන් වියදමට මුදල් ලැබීම, උත්සව සඳහා දඩමස් ඇනවුම් නොලැබීම, දඩයමක් කලොත් ගමේ ගම් බට්ටෝ හරහා පොලිසිය ඒ දඩයම ඩැහැ ගැනීම, දඩයමට දක්ෂ තරුණයන් බිහි නොවීම වැනි කරුනුත් හේතුවන බව පෙනී ගියා."

ඔහු ඉදිරිපත් කරන අදහස් සමඟ මට මුළුමනින්ම වාගේ එකඟ විය හැකිය. මේ කරුණු සියල්ල සාරාංශ කරනවානම් දැන් ලංකාවේ බොහෝ දෙනෙකුට සතෙකු දඩයම් කර මරා ගැනීමේ ආවස්ථික පිරිවැය කඩෙන් මස් ගන්නවාට වඩා සාපේක්ෂව වැඩිය. ඒ නිසා, දඩයම් කරනවාට වඩා කඩෙන් මස් කන එක වාසිදායකය.

අපේ ගෙවල් අවට කයෝටියෙකු සිටිනු තවමත් කිසි දිනක මා දැක නැතත් හාවුන්, මුවන් වැනි වෙනත් සතුන්නම් ඕනෑ තරම් දකින්නට පුළුවන. එහෙත්, රටේ සිටින මිනිසුන් ගණනට වඩා වැඩි පෞද්ගලික ගිණි අවි ප්‍රමාණයක් තිබෙන ඇමරිකාවේදී උත්සවයකදී හැර වෙනත් අවස්ථාවකදී ගිණි අවියක් පත්තුවෙනු මට කිසිදිනක දකින්නට හෝ අසන්නට ලැබී නැත. පාරේ කිසියම් සතෙකු සිටින විට ඒ සතා ඉවත්ව යන තුරු ඉවසිල්ලෙන් වාහන නවත්වාගෙන සිටින පිරිස්නම් නිතර දකින්නට ලැබේ.

ඇමරිකානුවන් සතුන් කෙරෙහි මේ තරම් අනුකම්පා සහගත වී සිටින්නේ ඔවුන් මිනිසුන් ලෙස ලාංකිකයින්ට වඩා සුවිශේෂී වන නිසා නොවේ. ඇමරිකානුවන්ට විල් ඊ කයෝට් මෙන් රෝඩ් රනර් කෙනෙකු පස්සේ පැන්නුවේ නැති වුනාට අඩු මිලට තමන්ගේ ප්‍රෝටීන් අවශ්‍යතා සපුරා ගන්නට හැකියාව තිබෙන නිසාය. ලාංකිකයින් දැන් දඩයම් කරන්නට අඩුවෙන් පෙළඹෙන්නේද මේ හේතුවම නිසාය.

ආර්ථික තත්ත්වය ඉහළ යන විට මිනිසුන්ගේ චර්යාවන්ද වෙනස් වේ. වෙනත් මිනිසුන්, සතුන් හෝ පරිසරය ගැන හිතන්නට මිනිසෙකුට අවකාශ සැලසෙන්නේ තමන්ගේ මූලික අවශ්‍යතා වැඩි අපහසුවකින් තොරව සැපිරෙන තරමටය.

ඉහත කරුණ දකින්නට ලැබෙන්නේ සතුන් මැරීම හා අදාළව පමණක් නොවේ.

අප කුඩා කාලයේදී ගම් වල කෙහෙල් කැනක් හෝ පොල් ගෙඩියක් හොරුන්ගෙන් පරිස්සම් කර ගැනීම ඉතා අසීරු කරුණක් විය. සාමාන්‍යයෙන් ගමක හොරෙක් ලෙස සැලකුණේ අනුන්ගේ වත්තකට හොරෙන් රිංගා තැඹිලි වල්ලක් බා ගන්නා හෝ කෙහෙල් කැනක් කපා ගන්නා ආකාරයේ සිල්ලර හොරුන්ය. ලොකු හොරකම් කෙසේ වෙතත්, මෙවැනි සිල්ලර හොරුන් දැන් දකින්නට ලැබෙන්නේ ඉතා අඩුවෙනි. මෙහි තිබෙන්නේද සමාජය වඩා සදාචාරාත්මක හෝ ආගමික වීමකට වඩා ආදායම් මට්ටම් ඉහළ යාම නිසා මෙවැනි සුළු හොරකමක් කිරීමේ ආවස්ථික පිරිවැය ඉහළ යාමයි. තාර්කික ලෙස හිතන මිනිසෙකු සතෙක් මරන්නේ හෝ හොරකමක් කරන්නේ එයින් ලැබෙන වාසිය ආවස්ථික පිරිවැය ඉක්මවන්නේනම් පමණි.

කෙසේවුවත්, මෙවැනි චර්යාවන් මුළුමනින්ම ආර්ථික කරුණු වලට ලඝු කරන්නට නොහැකිය. මෙවැනි දේ පිටුපස ජීවවිද්‍යාත්මක හා සංස්කෘතික පසුබිම්ද තිබේ. ඇමරිකානුවන් පවුල් පිටින් මාළු අල්ලන්නට යන්නේ අඩුමිලට සුපිරි වෙළඳසැලකින් මාළු මිලදී ගන්නට නොහැකි නිසා නොවේ. මාළු ඇල්ලීමේ ක්‍රියාවලිය තුළ ඔවුන්ට ලැබෙන තෘප්තිය නිසාය.

වීල් ඊ කයෝට් වෙත නැවත පැමිණියහොත්, අයෙක් කමෙන්ටුවකින් අසා තිබුණු පරිදි, මේ තරම් සැලසුම් කිරීමේ හැකියාවක් ඇති, මේ තරම් උපකරණ සපයාගත හැකි කයෝට්ට කඩේට ගොස් මස් මිල දී ගන්නට බැරි ඇයි?

කයෝට්ගේ ආතල් එක තිබෙන්නේ රෝඩ් රනර්ව අල්ලා හම ගසා කෑලි වලට කපා ගිල දැමීම තුළ නොවේ. එසේ කිරීම ගැන සිහින මවමින් රෝඩ් රනර්ව අල්ලා ගැනීමට දරන උත්සාහය තුළය. රෝඩ් රනර්ව අල්ලාගෙන ආහාරයට ගත් දවසට මේ ආතල් එක අවසන් වේ.

කයෝට්ගේ ආතල් එක පමණක් නොව කයෝට් පෙනී සිටින රෝඩ් රනර් ෂෝ එක නරඹන අයගේ ආතල් එක තියෙන්නේද රෝඩ් රනර්ව අල්ලා ගන්නට කයෝට් විසින් හැමදාමත් දඟලන දැඟලිල්ලේ හා දොඩන වහසිබස් වලය. කොයි තරම් දැඟලුවත් අන්තිමට රෝඩ් රනර්ව අල්ලාගත් පසු කයෝට්ට ලැබෙන්නේ මස් කලං කිහිපයක් පමණි. ඒ මස් ටික කයෝට් විසින් ගිල දමන ජවනිකාවේ බලා සිටින්නට තරම් ආතල් එකක් නැත. ඉන් පසුව, කොහොමටත් බලා සිටින්නට දෙයක් නැත.

රෝඩ් රනර් ෂෝ එක නරඹන්නට පිරිස් සිටින තුරු කයෝට්ට රෝඩ් රනර් ෂෝ එක දිගටම පෙන්වන්නට පුළුවන. එවැනි නරඹන්නන් නැතත් ඒ ෂෝ එකම පෙන්වමින් සිටිනවා හැර කයෝට්ට වෙන කරන්න දෙයක්ද නැත.

17 comments:

  1. මිනිස්සුන්ට වින්දනය දෙන්න ෂෝ එකක් පෙන්නනකොට කොහොම හරි ඒක දිගටම ඇදගෙන යන්න ඕන. කවදහරි දවසක ෂෝ එක ඉවර උනොත් එදාට මිනිස්සුන්ගෙ ආතල් එක කැඩිල නින්දෙන් ඇහැරෙනව.

    ReplyDelete
    Replies
    1. ෂෝ එක ඉවර නොකර හිමිහිට නවත්තල දමන වෙලාවලුත් තියෙනවා.

      Delete
  2. රෂියන් සීරීස් එකක් තියෙනවා නේද ඔය වගේම just you wait කියලා?

    ඇණයා නම් දන්නවා ඇති පැටිගිරිය.

    ReplyDelete
    Replies
    1. :) Ну, погоди ! ඔහේ හිටු!

      Delete
    2. You just wait.. ඒක පට්ට.. අදටත් ආසයි. :)

      Delete
    3. කයෝට් හා රෝඩ්රනර් වෙනුවට වෘකයා සහ හාවා ඉන්න මේ ආකෘතියේම කතාවක්. එයත් බලා ඉන්න ආස හිතෙන කාටූන් සීරිස් එකක්.

      Delete
  3. රෝඩ් රනර්ව අල්ලගෙන කන දර්ශන ඇතුලත්, රෝඩ් රනර් 'ෆයිනල් එපිසෝඩ්' කීපයක්ම තියනවා යූටියුබයේ, මම හිතන්නේ සමහර ප්‍රේක්ෂකයන්ගේ වැඩ...

    ReplyDelete
    Replies
    1. දිගින් දිගටම කයෝට් ඇනගන්න කොට (දෙවෙනි ඉනිමේ වගේ) ප්‍රේක්ෂකයින්ට වුනත් එපා වෙනවනේ.

      Delete
  4. http://www.stars-portraits.com/en/portrait-186588.html

    ReplyDelete
  5. +++++++++++++

    ගෙදර ඉන්න කුකුලා හෝ වත්තට එන තලගොයෙක් මරාගෙන කාල 'මස් වැද්දෙක්' වීමේ ආවස්ථික පිරිවැය සෑහෙන්න වැඩියි කඩෙන් දිනපතා මස් ගෙනත් කනවට වඩා....

    ReplyDelete
    Replies
    1. මේකේ ප්‍රතිඵලය තලගොයි වැඩිවෙන එක. ඔහොම ගිහින් තලගොයි වදයක් වෙන තරමට වැඩිවුණාම ඕක ආයෙම වෙනස් වෙනවා.

      Delete
  6. //ඉගෙන ගන්නා කෙනෙකුට ඉගෙනගන්නවානම් ඔය කාටුන් එකේ වුනත් ඕනෑ තරම් දේවල් තිබේ. උදාහරණයක් ලෙස ලොකු පල්ලමකට වැටෙන්නට යන විල් ඊ කයෝට් මත ගුරුත්වාකර්ෂණය බලපාන්නට පටන් ගන්නේ බිම බැලීමෙන් පසුවය. //
    මේ කියන්න හදන්නේ නලින්ද සිල්වා කියන දේද? මනසින් පරිබාහිර යතාර්ථයක් නැත කියල

    ReplyDelete
    Replies
    1. මනසින් බාහිර යථාර්තයක් තියෙනවා හෝ නැහැ කියා විශ්වාස කරනු හැර තහවුරු කරගත හැකි ක්‍රමයක් ගැන මම දන්නේ නැහැ.

      Delete
    2. නැහැ.මම ඇහුවේ ඒක නෙමෙයි. මේ වාක්‍යයෙන් කියන්න උත්සාහ කරන්නේ ඒවගේ දෙයක්ද කියල මට දැනගන්න උවමනා උනේ.

      Delete
  7. දඩයම් සහ ගිනි අවි ගැන සදහන් කරපු නිසා කාලයක් තිස්සේ මං අහන්න හිටපු දෙයක් අහන්න හිතුණා.. ඇමරිකාවේ මෑත කාලෙයේදී දිගින් දිගටම තැන තැන සිදුවන වෙඩි තැබීම් වලින් පුද්ගලයන් මිය යනවා..එවන් තත්ත්වයක් තුළ තවමත් ඇයි ඇමරිකාවේ පුද්ගලයන්ට ගිනි අවි සම්බන්ධයෙන් බලපාන නිතී රීතී තර කිරීමට පියවර නොගන්නේ?

    ReplyDelete
    Replies
    1. මිනිස්සු මිසක් තුවක්කු මිනී මරන්නෙ නෑනේ, ඇනෝ! ඔය වෙඩි තැබීම් වලට සම්බන්ධ වන ආකාරයේ මිනිස්සු තුවක්කු නොතිබුණත් වෙනත් අයුරකින් හෝ තමන්ට අවශ්‍ය දෙය කරනවා. පහතින් තියෙන්නේ අද රැස පත්තරේත් පළ කර ඇති (http://epaper.resa.lk/?id=10&tday=2018/02/05) පෙර ලිපියක කොටසක්.

      "අවි ආයුධ පරිහරණය කිරීමේ නිදහස ඇති ඇමරිකාවේ ගෙවන ජීවිතය ගිණි අවි වලට බියෙන් ගෙවන දිවියක්යැයි ඇමරිකාවෙන් පිටත සිටින ඇතැම් අය සිතති. එහෙත්, සැබෑ තත්ත්වයනම් මෙවැනි සුරක්ෂිත නොවන තත්ත්වයක් පවතින්නේ රටේ ඇතැම් සීමිත භූගෝලීය කලාප වල පමණක් වීමයි. ජාතික සංඛ්‍යාලේඛණ නරක ලෙස පෙනෙන්නේ එවැනි පෙදෙස් නිසාය. මා ජීවත් වූ පෙදෙසක පසුගිය වසරේ මිනීමැරුමක් සිදු වූ අතර ඉහළ මධ්‍යම පන්තියේ වැදගත් පවුලක පාසැල් දරුවකු විසින් කවර හෝ හේතුවක් මත සිදුකළ එම මිනීමැරුම සඳහා උපයෝගී කරගෙන තිබුණේ ගිණි අවියක් නොව පෑන පිහියකි. මා පෙර ජීවත් වූ වෙනත් පෙදෙසක අවසන් වරට මිනීමැරුමක් සිදුවී තිබුණේ හැත්තෑව දශකයේදීය."

      Delete

මෙහි තිබිය යුතු නැතැයි ඉකොනොමැට්ටා සිතන ප්‍රතිචාර ඉකොනොමැට්ටාගේ අභිමතය පරිදි ඉවත් කිරීමට ඉඩ තිබේ.